John 19

1Pailato Yeisu ilauvai ta yana tauꞌalehaone imomohedine, ta balavai ainaena hipwepwediline. 2Hinage haihaili womawomalina hivai ta ana pwaopwaomi hipai ta uluꞌulunai himwamwauwine yo hinage luwuluwu hawahawawalina hivai ta hiveveluwuine, 3mulitai hilaoma vahalinai na hiꞌabiꞌabitalawahiyei hiwalo, ‘Yauwedo, owa Yudeya yadi tauwasawasa!’. Na hinage nimadiyena higohagohanavanavai.

4Pailato ibwalenima ta bodaone aidiyai iwalo, ‘Amꞌita towahowa teina yamahalavaenamaꞌo ta ebe amhanapui neta nigele teya pwanoli yayalobai ainai’. 5Na mulitai Yeisu uluꞌuluna maꞌana pwaopwaomi yo maꞌana luwuluwu hawahawawalina hibwaleniyenama, na Pailato bodaone aidiyai iwalo, ‘Towahowa teina amꞌita’.

6Na taupwaoliwo yadi babadao mayadi taupaihowao Yeisu hiꞌita ta hiwuiwui hiwalo, ‘Amtutu yepatu’.

Na Pailato aidiyai iwalo, ‘Ambom amlauvai ta amtutuye patu, wuwuna yau nigele teya yana pwanoli yayalobai’.

7Ta Yudeyaone hiwalouyo, hiwalo, ‘Yama loina neta iya bada mata imwalowoi, wuwuna iꞌoyama ebeha iya Yaubada Natuna’.

8Tenem ainai Pailato walone ibenaledi ta imeheuhi mwalaꞌina Yudeyaone aidiyai. 9Na hinage Yeisu ilauvaiyoi ta hiluluwune yana vadai na ipanivilaei, iwalo, ‘Owa havaena ulalaomane?’ Na Yeisu nigele hava teya iyawalowei; bada inobu. 10Ta Pailato iwawalouyone, ‘Nigele yagu panivilane uyayemaiha awa? Na uhanapuiyaꞌo ebeha mayagu loina ta hilivahigo na mayagu loina ta umwalowoi.’

11Yeisu iwalo, ‘Nigele teya yam loina aliguwai imiyamiya ebe Yaubada nigele iyatalamwegau alimwai, na hesi uhanapui neta towahone iya itatalamwegaune yam loina ainai, iya ana veꞌewa mwalaꞌina, na abo owa’.

12Pailato walone tenem ibenalei ta nuwanuwana mwalaꞌina ebeha Yeisu ilivahi. Na Yudeyaone hiwuiwui mwalaꞌina hiwalo, ‘Ebe neta towahone ulivahi, owa nigele Sisa ana gelu. Wuwuna neta towahone iwalo ebeha iya tauwasawasa, ainaena tahanapuiyaꞌo ebeha iya Sisa ana aleha.’

13Ta Pailato yadi walone ibenalei eeta Yeisu ilauvai ibwaleniyenama ta Pailato imiyatalu yana abamiya talitalini ainai, Yudeyaone yadi yeha neta Gabata. 14Na bada mahana alaꞌalapwahi ainai mulitai abo vali ahubena, na Buidiꞌwa guyauna hiꞌai.

Ta Pailato iwalo, ‘Amꞌita yami tauwasawasa teina’. 15Na hiya hiwuiwui hiwalo, ‘Amtutuye patu’.

Hinage Pailato ipanivilauyo, ‘Vedova ta yami tauwasawasa na ebeha hiꞌoiye mwalowoi?’

Na taupwaoli mwalaꞌidi yana walone hiyemaiha hiwalo, ‘Yama tauwasawasa Sisa ibom’.

16Eeta Pailato italam ta ebe Yeisu hiꞌoiye patu.

Yeisu ana tutuye patu

Tauꞌalehaone Yeisu hiꞌabi avivini ta hilalaweine. 17Ibom ana aiwa lagalagana iꞌavalai ta hilalaune tupwa ehebo ainai yehanaede uluꞌulu dalavana (na alina Yudeyaena hiwalo Goligota). 18Ta tenem ainai hiꞌoiye patu na hinage towatowaho bwau hiꞌoiye patudi ta hivetowolodine vahalinai, ehebo nima tautuwanaena na ehebo nima ehaꞌehanaena na Yeisu ahipuwai.

19Pailato ilaulele ta hiꞌoꞌoiye patune Yeisu ana aiwa lagalaganane ainai, iwalo:

‘Yeisu towaho Nasaleti iya Yudeya yadi Tauwasawasa’
20Na tupwanane ainai Yeisu hiꞌoiye patune nigele amwaha daodao Yelusalem ainaena, eeta laulelene Yeisu vahunai himwamwauwiwa Yudeyaone maudoidi hivavahiline, wuwuna alina tonuga ainaena, hilelelene, alina Yudeya alina Loma na alina Gilisi. 21Na Yudeya yadi taupwaoli babadadiyao hilaoma ta Pailato ainai hiwalo, ‘Taubada, hava wuwuna ulele uwalo, Yudeya yama Tauwasawasa? Na hesi ebe ulele uwalo teina towahone iwalo ebeha iya Yudeya yadi Tauwasawasa.’

22Na Pailato aidiyai iwalo, ‘Hava yalelelelene imiyamiya lelelelena’.

23Na tauꞌaleha hitau vehopali Yeisu hiꞌoꞌoiye patune, ana aleꞌowa hivaidi ta higuyauwei hibom aidiyai na ana luwuluwu hivai ta hibom hiwalo havena tapulipulihi, wuwuna luwuluwu mwalaꞌina na tabatabana na nigele ana dahe, eeta ehebo aiꞌopiꞌopi hipaihowai dova kati, ta ebe yaiya imugai abo luwuluwunane ivai.

Nuwatuwunane dova hipapaihowaine ta ebeha hava Yaubada yana Buki Veꞌahihi ainai iwawaloweiwa ana moiha imahalava haugana iwalo:

‘Agu aleꞌo higuyauwedi’,
na agu luwuluwu hiꞌaiꞌopiꞌopiyedi.
25Na Yeisu ana aiwa lagalagana vahalinai waiwaihiu hitau vehopali hitowotowolo, hiya Yeisu hinana matahina yo vali Meli iya Kilopasi mwanena, na hinage Meli Magidalaena. 26Tenem ainai Yeisu iꞌitadobi ta hinanane waiwaihiuwone baidanao hitowotowolo iꞌiꞌitadine na hinage taumulitawa iya ivelauwei moiha iꞌiꞌitane, na hinanane ainai iwalo, ‘Hinagu, natum uꞌita’.

27Na hinage ana taumulitane ainai iwalo, ‘Augelu, hinam uꞌita’. Tenem ainai Yeisu yana mwalowoi tulahanai taumulitawa Yeisu hinanane ilauvai hilau yana vadai ta iꞌita avivinine.

Yeisu yana mwalowoi

28Tenem hauganane ainai Yeisu ihanapuiyaꞌo ebeha ginauli maudoina bada hiꞌoviꞌo ta iwalo, ‘Gadogune imaguni’. Ta teina walone ainaena Buki Veꞌahihi yana walomahalava ibwaleni iliꞌilimani. 29Tupwanane ainai waini mayumayuyuna mavedina himwauwi ta imiyamiya, na balou hivai ta hiyebuta weꞌahane mavedina ainai na teya aiwa yehanaede hisopa hivai ta baloune mabutabutana hiꞌatuwomalei na hivelele haeyei Yeisu awanai ta imalahuhuine. 30Mulitai Yeisu iwalo, ‘Bada iꞌoviꞌo’. Eeta uluꞌuluna iyagelo na yawahina iꞌoꞌovine.

Yeisu luhuluhuna hiwomali

31Yeisu yo towatowahowowa hitau bwau hitutuye patudi na Yudeyaone adi taumugaiwone hilau ta Pailato ainai hiꞌawanoi ebe howahowana italam ta aedine higodudi na ebe himwalowoi mwayamwayau ta ebe hiꞌavala aituluwuwedi adi aiwa lagalaganane aidiyena, wuwuna bada ahubena mwalaꞌina ilau tebitebiniyaꞌo, eeta hiya nigele nuwadi ebeha towatowahowone besiwa hiꞌabaꞌabahi ahubena tapwalolo ainai. 32Nigele ta Pailato italam ta tauꞌaleha tupwadi ivetamaledi hilau towatowahowone hitau bwauwa aedine higogodudine, ta himwamwalowoine. 33Na haugana hilau Yeisu ainai hilautaꞌai, hiꞌita bada imwalowoiꞌo, ta nigele aenane hiyagodudi. 34Na hesi ehebo tauꞌaleha, gitaena luhuluhunai iwowomaline ta ꞌwahina yo weꞌaha hisasagenane. 35Yau ana taumulita teya hava meheguwena yaꞌiꞌitadine teina vehabana yawalowalo alimiyai ta ebeha walo moihana teina amhanapui yo amyemidiyedi. 36Teina ginauliwone bada hibwaleniꞌo, ta ebe Buki Veꞌahihi yana walomahalava ibwaleni iliꞌilimani, hauganane iwalo, ‘Nigele mata teya hilihiliyanane hiyagodu’. 37Na hinage Buki Veꞌahihi yana walomahalava teya iwalo, ‘Towahonane hiwowomaline mata mulitai abo hiꞌita’.

Yeisu ana mwau magaiyai

38Ta bada ginauli maudoina hiꞌoviꞌo na ehebo towaho ilaoma ta Yeisu taunane Pailato ainai iꞌaꞌawanoiyeine. Iya Alimatiya towahona, yehanaede Yosepa, na hinage iya Yeisu ana taumulita dawadawanina, wuwuna Yudeyaone adi taumugaiwone aidiyai imeheuhi, na Pailato italam Yosepa ainai ta Yeisu tauna ivavaine. 39Hinage Nikodimo ilaoma Yosepa ihagui ta Yeisu taunane hivavaine. Iya Nikodimonane mwalona masigiliyena ilau Yeisu ainai ta baidana hiꞌaꞌaubabadane, na Nikodimo woloi teya mwalaꞌina na vitavitaina ivai ta ilawenama, na woloinane ana vitaine dova towaho ana vitai na aiwa bwau aidiyena hipapaihowaine hiya hiwalo mulo yo aloe. 40Ta towatowahowone hitau bwau Yeisu taunane hivai ta woloinane ainaena hiyewoloi na aleꞌo daodaodi, na hewahewadi ainaena hihuma woloine baidana, bada dova Yudeyaone yadi yemagai yo yadi atuꞌatububuni taumwalomwalowoi vehabadi. 41Na Yeisu yana abamwalowoi vahalinai, teya tanovi, na ainai magai, na magainane nigele teya taumwalowoi hiya mwauwi ainai. 42Ta magainane ainai Yeisu taunane himwamwauwine, wuwuna vahalidiyai na hinage bada Yudeyaone yadi tapwalolo ana ahubena ilautebitebiniyaꞌo.